Osmani – Emery: Diaspora, urë bashkëpunimi mes Maqedonisë dhe Australisë

Ministri i Punëve të Jashtme, Bujar Osmani, sot takoi Ambasadorin e sapoemëruar të Australisë në Republikën e Maqedonisë së Veriut, me seli në Beograd, Daniel Joseph Emery, i cili me këtë rast dorëzoi kopjet e letrave kredenciale.

Ministri Osmani i uroi suksese në misionin e tij diplomatik dhe shprehu besimin se ambasadori Emery me përvojën e tij diplomatike dhe angazhimin personal do të jep kontribut të rëndësishëm në zhvillimin e mëtejshëm të marrëdhënieve ndërmjet dy vendeve mike.

Në takim u shqyrtuan marrëdhëniet bilaterale ndërmjet Republikës së Maqedonisë së Veriut dhe Australisë, ku u theksua se urë e rëndësishme e bashkëpunimit është Diaspora jonë në Australi. U konfirmua edhe interesimi i ndërsjellë për avancimin e mëtejshëm të bashkëpunimit dypalësh, me theks të veçantë në bashkëpunimin ekonomik dhe mundësitë për forma të reja të lidhjeve biznesore dhe vazhdimin e bashkëpunimit të suksesshëm multilateral.

Bashkëbiseduesit shkëmbyen mendime për prioritetet e politikës së jashtme të të dy vendeve, si dhe për çështje aktuale ndërkombëtare dhe tema rajonale.