Kordinatori i LSDM Mitreski hedh akuza ndaj VMRO: Bllokojnë ligje që janë në interes të qytetarëve

Koordinatori i LSDM-së, Jovan Mitreski akuzoi se me muaj VMRO-DPMNE bllokon punën në kuvend.

Ai tha se seancat kuvendare zgjasin më shumë, ndërsa miratimi i ligjeve në interes të qytetarëve presin me muaj, të bllokuara në komisione që i udhëheq opozita.

“Dje gjatë gjithë ditës qytetarët kanë mundur të shohin se si deputetët e opozitës maqedonase shtynin seancën. Nuk lejojnë që shumica parlamentare të jetë edhe në grupet e punës dhe komisione. Puna në Komisionin për Zgjedhje dhe Emërime me muaj është bllokuar”, tha Mitreski.

Sipas tij, VMRO-DPMNE bllokon edhe ligje të tjera siç janë Ligji për Bujqësi dhe Zhvillim Rural që siguron subvencionim të naftës për bujqit për 100% në vend të 50%., Ligji për mësimdhënës ku sigurohen paga më të larta për mësimdhënësit, Ligji për shërbim në armatë.