Man. Siti dy herë me avantazh 2 golësh, Reali dy herë u kthye në lojë


Man. Siti ka shënuar fitore në ndeshjen e parë të gjysmëfinales së Ligës së Kampionëve ndaj Real Madridit. “Qytetarët” triumfuan me shumë vështirësi, me rezultat 4-3, ndaj “Los Blancos” në “Etihad”. Vendasit e filluan shumë mirë ndeshjen, kur shënuan dy herë për 11 minuta me anë të De Brujnes dhe Zhesusit.

Kur u mendua se gjithçka do të bëhej më e lehtë, në skenë doli Benzema që shënoi me një gjysmëvolej për ta ngushtuar epërsinë në 2-1. Kështu u shkua në pushimin në mes të pjesëve, me të dytën që filloi me zjarr. Golit të Foden iu përgjigj menjëherë Vinisius pr 3:2.

Këtu nuk përfundoi gjithçka, me Silvan që e befasoi Kortuan me një supergol, përderisa nuk vonoi as goli tjetër nga mysafirët për ta çuar në 4-3 këtë dramë përmes penaltisë me Panenka nga Benzema.

Ndeshja përfundoi me këtë rezultat dhe la hapësirë për shumçka në javën e ardhshme në “Bernabeu”.