Ministria e Shëndetësisë trajton çështjen e helmimit nga uji i pijes në Han të Elezit

Ministria e Shëndetësisë, të martën e 12 qershorit, ka njoftuar në Facebook se zëvendësministri i Shëndetësisë Arsim Berisha me këshilltarin politik të Ministrit Latifi, Anton Shllaku kanë qëndruar në Komunën e Hanit të Elezit për të trajtuar çështjen e dyshimeve për helmimin e qytetarëve nga uji i pijes në disa fshatra të kësaj komune.

Zëvendësministri Berisha është njoftuar nga autoritetet lokale shëndetësore të Hanit të Elezit se nga fillimi i ankesave të qytetarëve deri në ora 12 të ditës së sotme, ekipet mjekësore kanë vizituar 195 pacientë, kurse pas orës 12:00, 5 pacientë.

“MSh dhe ShSKUK kanë ndihmuar QKMF-në e Hanit të Elezit me furnizime me medikamente dhe materiale shpenzuese të nevojshme të kërkuara si nevoja emergjente. Ekipet e IKSHPK-së ndërkaq, kanë marrë edhe sot mostra për analizë laboratorike të ujit pas dyshimeve për intoksikim të ujit”, shkruhet në postimin e MSh-së.

Pamje të takimit

Në postim tutje shkruhet se, me qëllim të përballimit të situatës dhe ofrimit të shërbimeve për të gjithë qytetarët me ankesa, QKMF e Hanit të Elezit është mbështetur nga ekipet e Kujdesit Parësor Shëndetësor nga Komuna e Ferizajt dhe Komuna e Vitisë.

“Agjensioni i Menaxhimit të Emergjencave në kuadër të MPB-së, përmes cisternave, ka siguruar ujë të pijes për banorët e zonave ku qytetarët kanë pasur probleme shëndetësore, derisa IKShPK të konfirmojë rezultatet e mostrave të marra për analizat e ujit”.

Pamje të takimit

“Ministri i Administrimit të Pushtetit Lokal ka vizituar, gjithashtu, komunën e Hanit të Elezit duke iu ofruar mbështetje autoriteteve lokale për menaxhimin e situatës”.

Situata është nën monitorim të vazhduar dhe MSh, së bashku me IKShPK-në dhe dikasteret e tjera relevante si MPB-AME dhe MAPL janë në terren dhe në Komunikim të vazhdueshëm me autoritetet komunale për menaxhimin e situatës.