Për tre dekada, ajo njihej vetëm si Jane Doe, që kur trupi i saj u gjet i hedhur në argjinaturën e një autostrade ndërshtetërore në Indiana, në maj të vitit 1992.
Por në muajin prill të këtij viti, autoritetet në Boone County të Indianës, thanë se më në fund e kishin identifikuar atë si Margaret Ann Sniegowski Jr., një adoleshente që ishte zhdukur nga shtëpia që ajo ndante me prindërit e saj në Toledo të Ohios, transmeton “The New York Times“.
Ajo u gjet jashtë “Interstate 65” në Uashington Township, në veriperëndim të Indianapolis, e veshur vetëm me një bluzë të gjelbër të lehtë dhe çorape me kyçin e këmbës, sipas një raporti të FBI-së, vetëm një muaj para ditëlindjes së saj të 18-të.
“Që nga ajo ditë e tmerrshme, hetuesit nuk hoqën dorë nga përpjekjet për të zgjidhur çështjen,” tha në një deklaratë Zyra e Sherifit të Qarkut Boone, e cila drejtoi hetimin.
Në fund të vitit të kaluar, ata më në fund përcaktuan identitetin e gruas duke e përputhur ADN-në e saj me një profil që një nga gjysmë motrat e Sniegowski kishte ngarkuar në një faqe interneti të gjenealogjisë gjenetike, tha zyra e sherifit.
Në një konferencë shtypi, vëllai i zonjës Sniegowski, Lenny Sniegowski, u përpoq të mbante lotët, ndërsa përshkroi lehtësimin e familjes së tij kur më në fund mësoi se çfarë kishte ndodhur me të.
“Ajo nuk ishte plehër. Ajo ishte një person i bukur, argëtues, i dashur, optimist”, tha Sniegowski për motrën e tij, e cila njihej si Maggie.
“Familja ime është mirënjohëse për të gjithë ata që u shqetësuan, kërkuan, u kujdesën, qanë dhe trajtuan motrën time të vogël gjatë këtyre viteve në këtë rast, sikur ajo të ishte motra e tyre e vogël,” tha ai.
Ai iu lut familjeve të tjera me të dashurit e humbur që të mos e humbnin shpresën.
“Nëse ju ka ardhur dëshira të hiqni dorë, mos e bëni atë,” tha ai. “Ka ende njerëz në këtë botë që do të vazhdojnë të kërkojnë në emrin tuaj, pa marrë parasysh çfarë.”
Rasti është ndër më të fundit që ka përfituar nga përparimet në ADN dhe gjenealogjinë gjenetike, të cilat kanë ndihmuar hetuesit të rihapin rastet e ftohta, të identifikojnë viktimat e paidentifikuara, të gjurmojnë të dyshuarit dhe t’u japin familjeve një masë mbylljeje.
Në prill, autoritetet thanë se kishin konfirmuar identitetin e një njeriu të njohur si Vrasësi I-65, i cili ishte përgjegjës për të paktën tre vrasje përgjatë Interstate 65 në Indiana dhe Kentucky në fund të viteve 1980 dhe 1990.
Zbulimi në atë rast erdhi kur hetuesit përdorën gjenealogjinë gjenetike për të përputhur të dhënat e prejardhjes me ADN-në e Harry Edward Greenwell, për të cilin autoritetet thanë se kishte një të kaluar të gjerë kriminale.
Trupi i të zhdukurës, Sniegowski u gjet gjithashtu përgjatë Interstate 65 në Indiana, duke ngritur pyetje nëse kishte një lidhje me rastin “I-65 Killer”.
“Kjo pjesë është një hetim në vazhdim,” tha zëvendës Wesley Garst, një zëdhënës i Zyrës së Sherifit të Qarkut, Boone.
Hetuesit thanë se ishin përpjekur disa herë të identifikonin trupin e zonjës Sniegowski mirëpo, përpjekjet kishin rezultuar të pasukseshme.
Eshtrat e saj u zhvarrosën për herë të parë në vitin 2015, thanë autoritetet.
Në shkurt të vitit 2021, ata dërguan eshtrat në Othram, një laborator mjeko-ligjor që është i specializuar në përdorimin e gjenealogjisë gjenetike mjekoligjore për të ndihmuar në zgjidhjen e krimeve të vjetra.
Deri në shtator, ata kishin marrë me sukses ADN-në për të filluar ndërtimin e një profili dhe kërkimin e të afërmve të saj të gjallë.
Gjysmëmotra e viktimës, kurioze për historinë e saj familjare, kishte paraqitur një mostër të ADN-së në “ancestry.com”, faqen e internetit të gjenealogjisë.
Hetuesit thanë se ata e përputhën atë mostër me ADN-në e mbetjeve dhe, prej andej, ishin në gjendje të gjurmonin familjen e të ndjerës.
“Tani e di se kush është Jane Doe,” tha Don Lawson, i cili gjeti trupin e zonjës Sniegowski, në konferencën për shtyp. Z. Lawson, tani një komisioner i kontesë Boone, shtoi: “Nuk është vetëm dikush që e gjeta në një mënyrë fatkeqe. Ajo është një anëtare e familjes.”
Megjithëse, trupi i Sniegowski është identifikuar, çështja nuk është zgjidhur ende.
“Tani fillon puna për të gjetur njerëzit e varfër që e bënë këtë”, tha z. Sniegowski në konferencën për shtyp. Ai shtoi, “Kushdo që njeh familjen time e di se ne nuk e harrojmë”.
