“Besëtytnitë” e Anibarit ‘pushtojnë’ qytetin e Pejës – çfarë solli edicioni i 13-të i festivalit të animacionit?


Çdo verë qyteti i Pejës merr një ngjyrë ndryshe, jo falë festivalit të animacionti dhe filmit, Anibar, i cili organizohet tash e 13 vite.

Ishte pikërisht edicioni i 13-të ai i cili përcaktoi edhe temën e sivjetme mbi të cilën u zhvillua festivalit, të quajtur “Besëtytnitë”, kjo pasi në popull ekziston një bestytni tradicionale mbi numrin 13 dhe fatkeqësitë që ky numër mund të sjellë.

Por vetëm ters duket se nuk pati organizimin e Anibarit sivjet, kjo pasi sipas koordinatores së festivalin, Rina Statovci, gjithçka ka shkuar si më së miri.

Anibar 2022 (Foto: Anibar/Instagram)

“Gjithçka është duke shkuar super, sepse kemi qenë pak skeptikë duke marrë parasysh temën që e kemi pasur, “Superstitions (Bestytnitë)”. Kemi shumë mysafirë, njerëz që kanë ardhur qoftë prej rajonit, qoftë prej Kosovës por edhe vendeve të tjera të botës dhe jemi shumë të lumtur që e filluam me këmbë të mbarë”, tha Rina për Telegrafin.

Anibar 2022 (Foto: Anibar/Instagram)

Tutje, ajo u shpreh se është pikërisht ky festival ai i cili po i jep gjallëri qytetit të Pejës, i cili gjithmonë ka qenë i lidhur ngushtë me kulturën dhe në veçanti kinematografinë.

“Definitivisht numri i pjesëmarrëse të festivalit është jashtëzakonisht i madh. Po vërehet edhe qyteti i Pejës është gjallëruar. Krejt rrugët janë të mbushura me njerëz, kinematë i kemi të mbushura”, shtoi koordinatorja e Anibarit.

Rina Statovci (Foto: Telegrafi)

Dez Stavracos është një artist nga New Yorku, i cili ka qëndruar gjatë gjashtë ditëve të organizimit në Anibar, ku edhe ka ligjëruara para pjesëmarrësve mbi temën e animacionit dhe aplikimit të tij në reklama.

Ai për Telegrafin tregoi se si po i duket Kosova, shtet ky të cilin pati rastin që sivjet ta vizitojë për herë të parë.

“Pra, unë jam nga ShBA-ja, saktësisht nga New Yorku. Dhe unë jam këtu për të bërë një prezantim rreth animacionit në reklama. Është hera ime e parë këtu, po vij si mysafir i Lizës, ajo më rekomandoi që të vija dhe më prezantoi me njerëzit dhe ne organizuam këtë prezantim. Epo, është hera ime e parë. Dhe është një festival fantastik. Kurimi është i shkëlqyer. Ashtu si gjithçka që kam parë është vërtet, shumë e mirë, dhe njerëzit janë thjesht më të mirët. Kështu që po kaloj shumë mirë”, tha Stavracos për Telegrafin.

Dez Stavracos (Foto: Telegrafi)

E një mendim të ngjashëm e pati edhe shoqëruesja e tij në këtë festival, artistja Lisa LaBracio.

Ajo tha se një vizitë në qytetin e Pejës dhe specifikisht në festivalin e Anibarit, do t’ua sugjeronte të gjithë njerëzve të vendit të saj në New York.

“Unë jam vizitore nga qyteti i New Yorkut. Epo, unë jam këtu për festivalin e animacionit, Anibar dhe jam e emocionuar që do të jap disa prezantime dhe të jem në panel dhe do të shikoj shumë filma të animuar. Po, më pëlqen festivali i Anibarit. Kam nja dy vjet që vij, kështu që jam një fanse e madh e festivalit. Është shumë argëtuese të jesh, më pëlqen energjia rinore, gjithë përfshirja e komunitetit dhe se sa entuziastë janë të gjithë këtu. Unë do të jua rekomandoja plotësisht njerëzve nga ShBA-ja dhe nga kudo që të vijnë me të vërtetë të vizitojnë Pejën, veçanërisht Anbarin. Mendoj se është një festival i madh dhe unë mendoj se është me të vërtetë një takim i mrekullueshëm i komunitetit lokal dhe komunitetit ndërkombëtar. Dhe është vërtet një vend i mrekullueshëm për të qëndruar”, tha Lisa për Telegrafin.

Lisa LaBracio (Foto: Telegrafi)

Edhe regjisorja britanike Kate Jessop pati lëvdata për Anibarin gjatë një interviste për Telegrafin.

Ajo tha se realizimi i festivalit të animacionit në parkun e qytetit buzë liqenit, ia ka dhënë një hijeshi dhe dëshirë më të madhe për të marrë pjesë sa më shpesh në të.

“Unë jam nga Brighton, Mbretëria e Bashkuar. Anibari është një nga festivalet e mia të preferuara. Nuk po them vetëm se po më ftojnë mua të flas, por unë e dua Anbarin. Unë e dua komunitetin këtu. Është vërtet e mrekullueshme buzë liqenit dhe gjithashtu ka gjithmonë një përzgjedhje vërtet të madhe programesh gjithashtu. Sapo kam qenë në programin e të drejtave të njeriut më herët dhe jam në juri gjithashtu për kategorinë studentore dhe ballkanike Gala Frécon”, theksoi ajo.

Kate Jessop (Foto: Telegrafi)

Edhe pjesëmarrësit në festival dukeshin mjaft të emocionuar.

Artisti kolumbian i cili jeton dhe vepron në Belgjikë, i tha Telegrafit se ndjehet i lumtur që e vizitoi Kosovën për herë të parë, ani pse ishte paraparë të vinte edhe para tri vitesh në festival.

“Unë jam Santiego Perez, vij nga Kolombia, por tani jetoj në Bruksel dhe jam këtu sepse është hera e dytë që shfaq një nga filmat e mi në konkurs. Dhe këtë herë është një video-film i animuar që po shfaq. Kështu që vendosa të vij në Anibar. Ka një lloj mirësie, çiltërsie dhe spontaniteti që më pëlqen shumë nga Kosova deri më tani”, tha Santiego për Telegrafin.

Santiago Perez (Foto: Telegrafi)

Anibar 2022 u zhvillua nga data 13-19 korrik në Parkun e Qytetit në Pejë, ku në mbrëmjen finale u bë edhe vlerësimi dhe ndarja e çmimeve për filmat përkatës. /Telegrafi/