Shqipëria dhe Maqedonia e Veriut, të martën nisin negociatat për anëtarësim në BE

Shqipëria dhe Maqedonia e Veriut, të martën edhe zyrtarisht do t’i nisin negociatat për anëtarësim në Bashkimin Evropian (BE).

BE-ka ua ka dhënë dritën e gjelbër të dyja shteteve, pasi që Maqedonia e Veriut, e kishte miratuar në Kuvendin e saj, “Propozimin Francez”, i cili edhe e ka zgjidhur problemin që kishte ky shtet me Bullgarinë, i cili kishte të bënte me gjuhën dhe me pakicën bullgare që jeton në Maqedoni të Veriut.

Fillimin  e negociatave e ka bërë të ditur edhe kryeministri i Shqipërisë Edi Rama, ai ka shkruar në Facebook se dita e martë është një ditë e vecantë për shqiptarët.

“Me kënaqësinë e me krenarinë që sot Shqipëria e të gjithëve ne, pa dallim feje, krahine, ideje, moshe a statusi social, Shqipëria e Skënderbeut, e rilindasve, e dëshmorëve të luftës, e martirëve të regjimit komunist, e studentëve të Dhjetorit ’90, Shqipëria e familjeve të zakonshme shqiptare, kudo ndodhen dhe e fëmijëve tanë kudo ku rriten me prindërit e tyre, ulet në tryezën e madhe të Europës së Bashkuar për të filluar negociatat për anëtarësimin e saj”, ka shkruar Rama në Facebook.

Kryeministri i Shqipërisë, Edi Rama

Sipas agjendës së publikuar, Kryeministri Edi Rama do të takohet me homologun maqedonas, Dimitar Kovaçevski dhe presidenten e Komisionit Europian, Ursula Von der Leyen, në orën 08:30.

30 minuta më pas, ata do të zhvillojnë një konferencë të përbashkët për shtyp. Në orën 11:00 do të mbahet Konferenca e Parë Ndërqeveritare dhe në 12:30, Rama do të ketë një konferencë të përbashkët për shtyp me ministrin e Jashtëm të Çekisë, Jan Lipavsky dhe Komisionerin për Zgjerim në BE, Oliver Varhelyi, raporton A2News.

Kurse në orën 18:00, do të ketë një një pritje të përbashkët të delegacionit shqiptar me atë maqedonas, me rastin e hapjes së negociatave.

Procesi i integrimit të Shqipërisë dhe Maqedonisë së Veriut në BE, ishte bllokuar për shkak të vetos së përdorur nga shteti i Bullgarisë ndaj Maqedonisë së Veriut.

Ndërkaq, Shqipëria nuk kishte asnjë kontest me Bullgarinë, por BE-ja e kishte futur integrimin e Shqipërisë në një pako me Maqedoninë e Veriut dhe jo ndaras.