Në Malishevë gjenden mallra me afat të skaduar, shqiptohen 20 gjoba për pronarët e marketeve

Gjatë ditëve të fundit, Inspektorati i Komunës së Malishevës, ka zhvilluar një aksion në markete të ndryshme. Nga ky aksion janë shqiptuar 20 gjoba për pronarët e marketeve si pasojë e produkteve të gjetura me afat të skaduar.

Të premten e 22 korrikut, drejtoresha e Drejtorisë së Inspektoratit në Komunën e Malishevës, Besartë Kryeziu-Ramaj, ka njoftuar se  mallrat e konfiskuara janë asgjësuar, ndërsa marketet dhe pronarët e tyre, janë gjobitur sipas ligjeve në fuqi.

Besartë Kryeziu-Ramaj është shprehur se gjatë kontrollit është hasur në produkte me afat të skaduar, kryesisht në produkte ushqimore, kozmetikë dhe produkte tjera.

“Drejtoresha Kryeziu-Ramaj, ka bërë të ditur se kontrolli do të jetë i vazhdueshëm, por gjithashtu ju bën thirrje konsumatorëve, që sa herë që hasin në produkte me afat të skaduar, të njoftojnë inspektoratin komunal”, thuhet tutje në njoftimin për media.

Pamje nga operacioni i Inspektoratit të Komunës së Malishevës