Përshpejtimi i procesit për hapjen e vendkalimit kufitar Llojan -Miratoc ka qenë temë kryesore e diskutimit sot në takimin e kryediplomatit Bujar Osmani dhe Ministrit të Jashtëm të Serbisë, Ivica Daçiq, në margjinat e Forumit Ballkanik, i cili po mbahet në Budapest të Hungarisë.

Ministri Osmani ka hapur temën e kufirit dhe i ka folur Daçiqit për rëndësinë e hapjes së vendkalimit kufitar, duke theksuar mundësimin e lëvizjes së lirë si një prej qëllimeve kryesore të iniciativës së Open Ballkan.

Kujtojmë, Protokolli për mënyrën e kryerjes së kontrollit kufitar në pikën e përbashkët kufitare Llojan-Miratoc u nënshkrua muajin e kaluar në Beograd. Kjo përbënte hap të rëndësishëm drejt realizimit të këtij projekti, me rëndësi të veçantë për banorët përreth kufirit. Plani nënkupton që puna në terren të nisë në kohën më të shkurtër të mundshme për ngritjen dhe vënien në funksion të vendkalimit kufitar.