Shqipëria shënoi një fitore historike përballë Çekisë në “Air Albania”, duke siguruar trepikëshin që e mban Kombëtaren tonë në krye të grupit E.
Kuqezinjtë goditën rrjetën që në minutat e para të lojës me Jasir Asanin, i cili është kthyer në njeriun e momentit për Kombëtaren, pasi në gjashtë ndeshje të luajtura, ka shënuar tre gola spektakolarë.
Çdo gjë u bë më e lehtë për Shqipërinë kur gjyqtari ndëshkoi me karton të kuq Çutil dhe Çekia ngeli me 10 lojtarë në fushë.
Në pjesën e dytë të lojës Kuqezinjtë u kthyen në fushë të karikuar për të vulosur një fitore që do të mbahet mend gjatë me Seferin që realizoi një dopietë të përsosur.
Në momentin e 82 Shqipëria në top formë shënoi edhe golin e katërt, por festa u prish nga sistemi VAR.
Me këtë sukses djemtë e Sylvinhos ngjiten me 13 pikë në krye të grupit dhe janë me një këmbë në europianin “Gjermani 2024”.
Çekia doli kokëulur nga fusha e blertë, ndërsa në stadium shpërtheu festa e Kuqezinjve.
Festë pati edhe në dhomat e zhveshjes.
Rrugët e Tiranës u mbushën nga tifozë të çmendur, që festuan deri në agim me këngë patriotike, ndërsa boritë e makinave “zgjuan” kryeqytetin.
