Mbrëmjen e djeshme u arrestua nga policia përgjegjësi i doganës në Kakavijë si dhe një doganier. Gjithashtu u shpall në kërkim një tjetër. Këta persona dyshohet se merrnin ryshfet dhe kalonin mjetet e mallrave pa kryer kontroll.
Lidhur me këto arrestime ka reaguar në rrjetet sociale edhe ministri i Brendshëm Taulant Balla. Ai shpreh vlerësimin e tij për Agjencinë e Mbikqyrjes Policore për goditjen mbrëmjen e shkuar.
Sipas tij këto arrestime janë një mesazh i qartë ndaj kujtdo që kërkon të kthejë kohën pas, kur ngrihej trau për të mbushur xhepat e disa personave.
Këto raste ryshfeti, për Ballën, e bëjnë më të vëmendshëm policinë dhe institucionet për t’i goditur këto tentativa.
Postimi i Ballës në Facebook:
Një bravo
e merituar për Agjensinë e Mbikqyrjes Policore e cila ka goditur mbrëmë gjatë natës një rast flagrant kontrabande duke arrestuar fajtorët. Policia e Shtetit dhe Agjensia e Mbikqyrjes Policore do të rrisin forcën goditëse ndaj të gjitha formave të krimit ekonomik. Goditja e mbrëmshme është një mesazh i qartë ndaj kujtdo, të cilit i shkon në mendje të kthejë pas kohën e kaluar, kur “ngrihej trau” për të mbushur xhepat e disa personave, na bën më të vëmendshëm për t’i goditur fort këto tentativa.
