Partia Socialiste ka publikuar shkresat që faktojnë sipas saj se udhëtimet që pretendoheshin se i ishin paguar Damian Gjiknurit, nga biznesmeni Klodian Zoto, në fakt janë mbuluar nga buxheti i Ministrisë së Energjitikës.
PS ka publikuar faturat e biletave të avionit, dhe të rezervimit të hotelit për Gjiknurin, asokohe në postin e Ministrit.
Vetë Gjiknuri tha sot se ai nuk ka lidhje me biznesmenët e aferës së inceneratorëve, duke mohuar kështu çdo akuzë që mund të ngrihet për përfshirjen e tij.
“Shkurt se e di që keni kuriozitet, qëndrimet e mia i kam bërë publike në komisionin hetimor, nuk ka ndodhur asgjë e re nga ajo kohë përveçse se përdoret emri im për kauza politikë. Ato udhëtime të pretenduara janë zyrtare, ka dokument në ministri, janë në dijeni që dhe prokuroria i zotëron, edhe unë, skam pse nxjerr letra.
Nuk kam vajt as për qejf dhe as kam bredh me njerëz që pretendohet. Roli im si ministër nuk ka asnjë shkelje. Mos e bëni hetimin penal sikur po hetojmë pacientin zero, ky njeh këtë dhe ka takuar këtë dhe ka infektuar të tjerët. S’është mëkat të njohësh njerëz të rinj.
Me Ahmetajn kam bërë udhëtim se ka qenë ministër dhe koleg. U thash për dy udhëtimet. Kam zbatuar ligjin, akuza politike dhe kuazi penale ka vite që ngrihen për mua. Është shumë vapë tani, dhe ju duheni… Po i publikova faturat, çfarë do thuash pastaj? Pse çfarë jam unë të shuaj kuriozitetin tuaj….”, tha sot Gjiknuri përpara hyrjes në Kuvend.
